කොස්ගොඩ කැස්බෑ පර්යේෂණායතනයේ සිටි රුපියල් කෝටි 4කට වැඩි වටිනාකමකින් යුත් ඉතා දුර්ලභ ගණයේ සුදු කැස්බෑවකු පෙරේදා (15) රාත්‍රී කිසියම් අයකු විසින් සොරා ගෙනයාමේ සිද්ධිය පිළිබඳව මාධ්‍යට අදහස් දක්වමින් ආබ්‍රෙව් මහතා මේ බව කියා තිබිනි.
ඒ මහතා වැඩිදුරටත් මෙසේද පැවසීය.
මේ සතා කොල කැස්බෑ වර්ගයට අයත් සතෙක්. සුදු කැස්බෑවා මට මගේ පුතා වගේ. කැස්බෑවට මෙච්චර ඉල්ලුමක් ආවේ දැනට මාස හයක පමණ කාලයක සිට. මේ සතා අපට ලැබුණේ 2007 වසරේදී. මේ සතා හදන එක ළමයෙක් හදනවාට වඩා අමාරුයි.
දැනට මාස හයකට උඩදී රත්නපුර ප්‍රදේශයේ පුද්ගලයෙක් මේ සතාව රුපියල් ලක්ෂ පහකට ඉල්ලුවා. ඊට සති දෙකකට පසුව රුපියල් ලක්ෂ දහයකට ඉල්ලුවා. මාසයකට පසු රුපියල් ලක්ෂ පනහකට ඉල්ලුවා. තවත් සමහරු රුපියල් කොටි තුනකට, තුනහමාරකට, හතරකට ඉල්ලුවා. ඒත් මම සතාව දෙන්න කැමති වුණේ නෑ.
මීට මාස තුනකට පමණ ඉහතදී ප්‍රසිද්ධ තරුණ ගායකයෙක් රුපියල් කෝටි තුනහමාරකට සුදු කැස්බෑවා ඉල්ලුවා. මම කිව්වා කීයක් දුන්නත් සුදු කැස්බෑව දෙන්නේ නෑ කියලා. ඒත් ඔහු අවස්ථා හතර පහකදීම සතාව ඉල්ලුවා. ඔහු කිව්වා සිංගප්පූරුවේ හෝටලයකට සහ මාලදිවයිනේ ‘වයිටින් කැස්බෑවා’ කියන හෝටලයට සුදු කැස්බෑවා ඉල්ලනවා. ඒ නිසා සතාව දෙන්න කියලා. මම කිව්වා ඔයා ඔයාගේ පුතාට ආදරෙයි වගේ තමා මම මේ සතාට ආදරය කරන්නේ කියලා. ඉන් පසු ඔහු මගෙත් එක්ක ටිකක් අමනාප වුණා. පසුව ඔහු තවත් පුද්ගලයින් යොදවා සතාව මගෙන් ගන්න පුළුවන්ද කියලා උත්සාහ කළා.
දේශපාලකයොත් සුදු කැස්බෑවාට ඉව අල්ලලා :
වරක් ප්‍රාදේශීය සභාවක සභාපතිවරයකුත් සුදු කැස්බෑවා ඉල්ලුවා. තවත් වරෙක දුරකතන ඇමතුමක් ආවා ඇමැති කෙනකුගේ පුතෙක් කියලා කියපු කෙනකුගෙන්. ඔහු සතා ඉල්ලපු අවස්ථාවේදී බහින් බස් වීමකුත් සිදුවුණා.
මම අවුරුදු 35 ක කාලයක සිටයි මේ වෘත්තියේ යෙදී සිටින්නේ. මගෙන් මේ සතාව මිලදී ගන්න පුද්ගලයින් 200 විතර කතාකරලා තියෙනවා. ඒ අයගෙන් සිය දෙනකුගේ විතර දුරකථන අංක වාහන අංක මා සතුව තියෙනවා. ඒ තොරතුරු සියල්ල මම වනජීවි එකට සහ පොලිසියට ලබාදී තිබෙනවා යැයි ආබ්‍රෙව් මහතා රිවිර පුවත් පතට පවසා තිබිනි.
කැස්බෑවුන් දස දහසකට පමණ එක් ඇලි කැස්බෑවකු බිහිවන බවත්, එබැවින් මෙවැනි සතුන් මිල නියම කළ නොහැකි අමිල වටිනාකමකින් යුතු බවත් පරිසරවේදීහු කියා සිටිති.
ජාන විකෘති වීමෙන් සතුන්ගේ ‘ඇලි’ තත්ත්වය ඇතිවන බවත්, මෙහි දී මෙලනින් වර්ණකය ශරීරයෙන් ඈත් වී ඇස් රෝස පැහැ ගැන්වෙන බවත් පරිසරවේදීහු සඳහන් කරති.
මෙරට හමුවන කැස්බෑ වර්ග පහකි. කොළ, ධාර, පොතු, ගල් හා ඔළුගෙඩි එම කැස්බෑ වර්ග පහ වේ.
මෙවැනි ඇලි කැස්බෑවුන් ස්වභාවික පරිසර පද්ධතියේ සෑදීම ඉතාමත් අපහසු වන අතර විශේෂ තත්ත්වයන් යටතේ සෑදිය යුතු බවත් මෙවැනි ඇලි කැස්බෑවුන් විදේශ රටවල ඇතැම් සුල්තාන්වරුන්ගේ පෞද්ගලික සත්වෝද්‍යානවලට ගෙන යාමේ උත්සාහයක් ද පවතින බවත් ඒ එම ඇලි කැස්බෑවුන්ගේ අමිල වටිනාකම නිසා බවත් පරිසරවේදීහු කියා සිටිති.
ජුරාසික් යුගය දක්වා විහිදෙන කැස්බෑ ඉතිහාසය :
කැස්බෑවුන් වූ කලී අති දුර්ලභ සත්ත්ව විශේෂයක් බවත් කැස්බෑවුන්ගේ ඉතිහාසය ජුරාසික් යුගය දක්වා විහිදෙන බවත් පරිසරවේදීහු වැඩිදුරටත් සඳහන් කරති.
පෙරේදා (15) සවස 6.30ට පමණ කැස්බෑ පර්යේෂණායතනයේ දොරවල් වැසීමෙන් පසු ඊයේ (16) උදෑසන 6.00ට පමණ එය නැවත විවෘත කිරීමේ දී මෙම කැස්බෑවා සොරකම් කර තිබූ බවත් කැස්බෑ පර්යේෂණායතනයේ භාරකරු බි.එච්. දමින්ද (30) මහතා කොස්ගොඩ පොලිසියට පැමිණිලි කර තිබේ.
වයස අවුරුදු 5ක් වන මෙම කැස්බෑවා දිගින් අඩි 2ක් පමණ වන බවත් බර කිලෝ ග්‍රෑම් 9.5ක් වූ බවත් එම පැමිණිල්‍ලේ වැඩිදුරටත් සඳහන් වේ.
මේ වන විට කොස්ගොඩ පොලිසිය කැස්බෑ සොරකම සම්බන්ධයෙන් පුළුල් පරීක්ෂණ ආරම්භ කර තිබේ. අම්බලන්ගොඩ මූලස්ථාන පොලිසියේ පොලිස් නිල සුනඛ අංශය සහ ඇල්පිටිය විශේෂ අපරාධ ස්ථාන විමර්ශන ඒකකය ද පරීක්ෂණවලට සහාය වේ.
කොස්ගොඩ පොලිස් ස්ථානාධිපති ප්‍රධාන පොලිස් පරීක්ෂක ලාල් උඩුගමගේ, උප පොලිස් පරීක්ෂකවරුන් වන ජනක, සෙයිසා යන මහත්වරු වැඩිදුර පරීක්ෂණ පවත්වති.
(රිවිර- සාලිය කුමාර ගුණසේකර / ජයකාන්ත ලියනගේ - අහුන්ගල්ල/කමල් ශ්‍රී ලියනගේ - බලපිටිය)
*************************************************************************************
